منتدى أبطال دريم بوكس
السلام عليكم و رحمة الله و بركاته . اخواني و اخواتي الكرام مرحبا بكم في منتدى
يرجى التسجيل في منتدى لي تعم الفائده

فيق يزي من النوم

اذهب الى الأسفل

فيق يزي من النوم

مُساهمة من طرف kamelo في الأربعاء مايو 30, 2012 11:21 am




[ندعوك للتسجيل في المنتدى أو التعريف بنفسك لمعاينة هذه الصورة]



أخواننا في المنتدى الإسلامي أكتب لكم موضوعي
و إن شاء الله لن يكون الأخير وبما أن شهر رمضان على الأبواب خيرت أن أبدأ بموضوع حوله
و هي سلسلة تتكون من 5 أجزاء مقتبسة من الد. مصطفى زايد المصري.
هذه السلسلة ستكون باللهجة التونسية البسيطة
و هي بعنوان فيق يزي من النوم

و اللهم بلغنا رمضان..
واعتق رقابنا من النار..
و ارزقنا الفردوس الأعلى..
الأجزاء هي:


الجزء الأول:مستعد؟؟؟


الجزء الثاني: علاش هذا الكل؟؟؟


الجزء الثالث: كيفاش نستعد؟؟؟


الجزء الرابع: شتصوم ولا كيف كل عام؟؟؟


الجزء الخامس: رد بالك تكون مسلسل؟؟؟






الجزء الأول:مستعد؟؟؟



ــ علاش وقت الي يكون عنا حد غايب علينا و نحبوه برشة
و عنا قداش من شهر نستناو فيه يرجع نقعدوا نفكروا كيفاش نقابلوه في المطار؟
شنوه نلبس؟ شنوه نهز معايا؟ شنوه نحضرله و هو أغلى انسان عندي
و ياعالم نشوفه مرة أخرى ولا لاء ؟؟؟!!!
ــ ووقت الي فم ماتش كورة مهم مع بلاد أجنبية يقعدوا يحضرولوا من قبل بشهر ولا أكثر
و الدنيا تتقلب على جاله؟؟؟
ــ انظر أتو تلقى أي حدث مهم في الدنيا الناس تقعد تفكر فيه و تحضرله
وعلى قد أهمية الحدث على قد ماتكون التحضيرات أكبر



باهي احنا كيفاش استعدينا لأهم حدث في العام كله؟؟؟
كيفاش استعدينا لأكبر حدث حسنات و رحمة و مغفرة في العام كله؟؟؟
كيفاش استعدينا لأخطر فرصة في عمرنا الكل؟؟؟
مالا كيفاش ؟؟؟



ماذا أعددنا لرمضاااان؟؟؟
الي يسمعني اكيد شيقول احنا فين و رمضان فين!!!
وناس اخرى حتى وكان مازال أيامات على رمضان تقلك مازال بكري!!!
وقت الي يجي رمضان يحلها الحلال!!!
ومع كل أسف تسمع الكلام هذا من عند برشة ناس..!!
قلي لوكان أي لاعب قبل مايدخل للماتش ومايسخّنش موش اتو يجيه شد عضلي من الـ5 دقايق اللوله
إذا كان هذا حالنا قبل رمضان فعلاش نستغرب انه مانجمناش نكملوا رمضان
بنفس الروح و العزيمة الي الكل بدا بيها في أول الشهر؟؟
ماتستغربوش خاطرنا ماستعديناش بالطريقة الصحيحة قبل رمضان و طبيعي تكون أذيكا النتيجة ...
على هذاكا لازم نسألوا رواحنا
كيفاش استعدينا لرمضان؟؟؟



نعرف ألي الإجابة محرجة عند أكثر الناس إلا من رحم ربي
خاصة لما نقرا في سير الصحابة و السلف الصالح
و نشوفوا كيفاش كانوا يحضروا لها الشهر العظيم و قداش كان عندهم عزيمة و صدق مع الله
و على هذاك كان ربي يعطيهم القوة و يباركلهم في شهر رمضان.



الواحد فينا مستعد يعمل أي حاجة في روحه باش يبطل استهتار و تهاون و غفلة ألي هو عايش فيها...
قال الله تعالى: "ولو أرادوا الخروج لأعدوا له عدة" (التوبة/46)
الي يحب يفوز برمضان لازم يحضرلوا من توه .. شوف الي يقرا و عنده امتحانات قداش يحضر و يجتهد
فم تلامذة في الباك ماترقدش كان ساعتين ولا ثلاثة و هي تراجع هذا الكل على جال امتحان دنيوي
يعني لو واحد مانجحش لا قدر الله مش مشكلة كبيرة فما بالك الاستعداد للشهر الفضيل شهر رمضان
مالا فيق و يزي من النوم ماعادش بكري عليك

[ندعوك للتسجيل في المنتدى أو التعريف بنفسك لمعاينة هذه الصورة]






الجزء الثاني: علاش هذا الكل؟؟؟


برشا ناس شتسأل: أحنا نعرفوا ألي شهر رمضان شهر البركة و الإيمانيات و كل شيء ..
أما علاش هذا الكل؟؟؟
أعلاش الإهتمام الزايد بشهر رمضان ؟؟؟
اشمعنى رمضان بالذات ألي تقولوا لازم نستعدولوا و نجتهد فيه و نموتوا رواحنا في الطاعة و العبادة ؟؟؟



إيجاوا نشوفوا مع بعضنا علاش لازم نستعدوا لرمضان ..؟؟
على خاطر شهر رمضان فيه فضائل و مميزلت لوكان تعرفها ، أتو تعرف قداش يلزمك تستعد ليه ..
أتو تعرف قيمة رمضان و قدره الحقيقي.. أتو تعرف ألي الثانية فيه من ذهب.. والله و أغلى من الذهب ..



إيجاو نشوفوا بعض فضائل شهر رمضان:

1ــ شهر الركة:
قال رسول الله صلى الله عليه و سلم: " أتاكم رمضان شهر مبارك ..." (صححه الألباني)
و قال أيضا صلى الله عليه و سلم: " رمضان شهر مبارك ... " (صححه الألباني)
رمضان شهر بركة .. بركة في كل حاجة ..



2ــ شهر تسلسل فيه كل الشياطين:
قال رسول الله صلى الله عليه و سلم: " أتاكم رمضان شهر مبارك فرض الله عز و جل عليكم صيامه
تفتح فيه أبواب السماء وتغلق فيه أبواب الجحيم ، و تغل فيه مردة الشياطين ،
لله فيه ليلة خير من ألف شهر ، من حُرم خيرها فقد حٌرم . " (صححه الألباني)
وقال صلى الله عليه و سلم: " إذا دخل شهر رمضان فتّحت أبواب الجنة وغلّقت أبواب جهنم
و سلسلت الشياطين. " (متفق عليه)
عندك 11 شهر و انت تقول الشيطان الشيطان .. أهوكا الشيطان اتسلسل ..
مالا شنوه ألي يخليك تعصي ربي من بعد؟
مالا استغل الفرصة باش تصلح روحك ..



3ــ تفتح فيه أبواب الجنة و تغلق فيه أبواب الجحيم:
قال رسول الله صلى الله عليه و سلم: " إذا دخل شهر رمضان فتّحت أبواب الجنة وغلّقت أبواب جهنم . " (متفق عليه)
أبواب النار كلها مسكرة يارب ليك الحمد و الشكر ..
و أبواب الجنة كلها محلولة قدامك ..
زعمة تلحق قداش من باب منها ؟
و لو كان نلاحظوا الأحاديث نلقاو فيها 3 روايات كل واحد بلفظ مختلف:
أول رواية: " تفتح فيه أبواب السماء .. "
إشارة إلى إستجابة الدعاء..
ثاني رواية: " تفتح فيه أبواب الجنة .. "
إشارة للخير و البركة و الحث على التنافس و المسارعة في الطاعات..
ثالث رواية: " تفتح فيه أبواب الرحمة .. "
إشارة لكثرة الرحمة و العفو و المغفرة ..



4ــ شهر صيام = ثواب سنة صيام
قال رسول الله صلى الله عليه و سلم: " صيام شهر رمضان بعشرة أشهر، و صيام ستة أيام بعده بشهرين،

فذلك صيام السنة. " (صححه الألباني).
30 رمضان + 6 شوال = 360 ... !!



5ــ شهر تكفير الذنوب و الخطايا:
قال رسول الله صلى الله عليه و سلم: " الصلوات الخمس، والجمعة إلى الجمعة و رمضان إلى رمضان،
مكفرات لما بينهم إذا اجتنبت الكبائر. " (رواه مسلم)



6ــ شهر الصِلة بين السماء و الأرض:
أنزل الله في رمضان كلامه و كتبه و خاطب فيه خلقه ..
قال رسول الله صلى الله عليه و سلم: " أنزلت صحف إبراهيم أول ليلة من شهر رمضان،
و أنزلت التوارة لست مضت من رمضان، و أنزلت الإنجيل بثلاث عشرة مضت من رمضان،
و أنزلت الزبور لثمان عشرة خلت من رمضان، و أنزلت القرآن لأربع و عشرين خلت من رمضان. "
(حسنه الألباني)
و قال تعالى: " شَهْرُ رَمَضَانَ الَّذِي أُنْزِلَ فِيهِ الْقُرْآنُ هُدىً لِلنَّاسِ وَبَيِّنَاتٍ مِنَ الْهُدَى " (البقرة/185)
و الشهر الذي أنزل فيه القرآن لا بد أن له مكانة عظيمة بين الشهور..
فرب العزة لا يختار الأوقات بدون حكمة أو معنى ..
تعالى سبحانه عن ذلك عفوا كبيرا ..



7ــ كل يوم و ليلة في رمضان فرصة للعتق من النار:
قال رسول الله صلى الله عليه و سلم: " إذا كان أول ليلة من شهر رمضان صُفدت الشياطين و مَرَدة الجن،
و غلقت أبواب النار فلم يُفتح منها باب، و فتحت أبواب الجنة فلم يغلق منها باب، و ينادي مناد كل ليلة:
يا باغي الخير أقبل، و يا باغي الشر أقصر، ولله عتقاء من النار، و ذلك كل ليلة ." (صححه الألباني)
تعرف شمعناها عتق من النار؟؟؟
تخيل روحك عبد عند واحد من الناس.. لو كان يعتقك، يعني تولي حر،
و الشخص هاذاكا ماعادش يحكم فيك. و هكاكا النار..
قال تعالى: " مَأْوَاكُمُ النَّارُ هِيَ مَوْلَاكُمْ وَبِئْسَ الْمَصِير" (الحديد/15)
يعني العتق الخروج من الولاية .. و النار ماتكونش مولاك ..
و في آية أخرى يقول تعالى: " أُولَئِكَ أَصْحَابُ النَّارِ هُمْ فِيهَا خَالِدُونَ " (البقرة/39)
فالعتق هو التخلي عن هذا المِلك، ملكية النار للإنسان.
ربنا يقول: " فَمَنْ زُحْزِحَ عَنِ النَّارِ وَأُدْخِلَ الْجَنَّةَ فَقَدْ فَازَ " (آل عمران/185)
العتق من النار يعني ماعادش فم عذاب..
مانا آش مشنعموا في هاالشهر باش نكونوا من العتقاء من النار؟؟؟



8ــ ثلاثة فرص في شهر واحد لمغفرة ماتقدم من ذنبك
قال رسول الله صلى الله عليه و سلم: " من صام رمضان إيمانا و احتسابا، غفر له ماتقدم من ذنبه. "
(متفق عليه)
و قال صلى الله عليه و سلم: " من قام شهر رمضان، إيمانا و احتتسابا، غفر له ماتقدم من ذنبه. "
(متفق عليه)
و قال صلى الله عليه و سلم: و من قام ليلة القدر إيمانا و احتسابا، غفر له ماتقدم من ذنبه. " (متفق عليه)
3 فرص قداك باش تتغفر ذنوبك و البلاوي الزرقا الي عملتها العام الكل..
3 فرص باش تتطهر من ماضيك و تبدا صفحة جديدة بيضا..
فماشي شكون عاقل يفوت ها الفرصة العظيمة..؟



9ــ شهر فيه ليلة القدر:
ليلة عبادتها خير من ألف شهر..
قال تعالى: " لَيْلَةُ الْقَدْرِ خَيْرٌ مِنْ أَلْفِ شَهْرٍ " (القدر/3)
عبادة في ليلة وحده ثوابها أفضل من عبادة 83 سنة !
شنوه ها الثواب العظيم قداش انت رحيم و كريم يارب..
قال رسول الله صلى الله عليه و سلم: " إن هذا الشهر قد حضركم، و فيه ليلة خير من ألف شهر،
من حُرمها فقد حُرم الخير كله! ولا يُحرم خيرها إلا محروم. " (صححه الألباني)
على هاذاكا لازم تجتهد في العشر الأواخر من الشهر باش تدركها بإذن الله،
و ماتكونش من المحرومين من الخير و الثواب العظيم.



10ــ شهر لك فيه كل يوم دعوة مستجابة:
قال رسول الله صلى الله عليه و سلم: " إن لله تبارك و تعالى عتقاء في كل يوم و ليلة ـ يعني في رمضان ـ

و إن لكل مسلم في كل يوم و ليلة دعوة مستجابة. " (صححه الألباني)
و قال صلى الله عليه و سلم: " ثلاث دعوات مستجابات، دعوة الصائم، و دعوة المظلوم، و دعوة المسافر."
(صححه الألباني)
قول يارب.. في موسم الطاعة و البركات قول يارب.. اطلب آش تحب.. أكيد كلنا عندنا هموم و مشاكل و طلبات..
هز يديك لفوق و قول يارب و انت كلك يقين انه دعاءك مستجاب..
قول يارب اغفرلي الي تعدى.. و اقبل مني.. و ثبتني في الي جاي.. بحمتك يارب العالمين..
انت متخيل الفضائل الي ذكرناها ..
شكون يعرف الفضايل هذي الكل و يضيعها؟؟
هذا الكل حاجة بسيطة..



انت عارف أصلا شنوه ثواب الصيام وحده؟؟؟
1ــ الصوم عمل ليس له مثيل :
قال رسول الله صلى الله عليه و سلم: " عليك بالصوم فإنه لا مثيل له. " (صححه الألباني)

2ــ ثواب الصوم لا يعلمه إلا الله:
قال رسول الله صلى الله عليه و سلم: " كل عمل ابن آدم له، إلا الصيام، هو لي، و أنا أجزي به. " (متفق عليه)
3ـ الصوم يشفع لك يوم القيامة:
قال رسول الله صلى الله عليه و سلم: " القرآن و الصيام يشفعان للعبد يوم القيامة،
يقول الصيام أي رب منعته الطعام و الشهورة فيشفّعني فيه، و يقول القرآن منعته النوم بالليل فيشفعني فيه،
قال فيشفعان. " (صححه الألباني)
4ـ الصيام يبعدك عن النار:
قال رسول الله صلى الله عليه و سلم: " من صام يوما في سبيل الله بعد الله وجهه عن النار سبعين خريفا. " (متفق عليه)
5ـ الصيام يدخلك الجنة:
قال صلى الله عليه و سلم: " من خُتِم له بصيام يوم دخل الجنة. " (صححه الألباني)
6ـ الفوز بالدخول من باب الريان في الجنة:
قال رسول الله صلى الله عليه و سلم: " في الجنة ثمانة أبواب منها باب يسمى الريان
لا يدخله إلا الصائمون. " (متفق عليه)
7ـ الصيام يجعلك من الصديقين و الشهداء:
جاء رجل إلى النبي صلى الله عليه و سلم فقال يا رسول الله: " أرأيت إن شهدت أن لا إله إلا الله
و أنك رسول الله و صليت الصلواة الخمس و أديت الزكاة و صمت رمضان و قمته، فمن أنا ؟؟؟
فقال النبي صلى الله عليه و سلم: " من الصدقين و الشهداء." (صححه الألباني)
8ـ مضاعفة الحسنات أكثر من 700 ضعف:
قال رسول الله صلى الله عليه و سلم: " كل عمل ابن آدم له يضاعف الحسنة بعشر أمثالها
إلى سبعمائة ضعف قال الله تعالى إلا الصوم فإنه لي و أنا أجزي به. " (متفق عليه)
9ـ الفوز بثواب الصابرين:
قال رسول الله صلى الله عليه و سلم: " شهر الصبر رمضان. " (صححه الألباني)
و قد قال الله تعالى عن ثواب الصابرين: " إِنَّمَا يُوَفَّى الصَّابِرُونَ أَجْرَهُم بِغَيْرِ حِسَابٍ " (الزمر/10)
شفت ثواب الصيام وحده قداش؟؟؟



لازم بإذن الله ناخذ النوايا هذه الكل و نجددوا نيتنا و احنا صايمين باش نضعفوا الثواب
و الأجر عند ربي سبحانه..
تعرف ألي السحور زاده فيه أجر ؟
قال رسول الله صلى الله عليه و سلم: " السحور كله بركة فلا تدَعوه ولو أن يَجرع أحدكم جرعة من الماء،
فإن الله عز و جل وملائكته يُصَلّون على المتسحرين. " (حسنه الألباني)
رمضان فرصة العمر والله..
فرصة لوكان تضيعها، تستاهل انك تكون من الناس ألي ورد فيهم حديث النبي صلى الله عليه و سلم:
" أتاني جبريل، فقال: يا محمد ! من أدرك أحد والديه فمات فدخل النار فأبعده الله، قل: آمين، فقلت: آمين،
قال: يا محمد، من أدرك شهر رمضان فمات فلم يغفر له فأدخل النار فأبعده الله، قل: آمين، فقلت آمين،
قال: و من ذكرت عنده و لم يصل عليك فمات فدخل النار فأبعده الله، قل: آمين، فقلت: آمين. " (صححه الألباني)
و في رواية ثانية، قال رسول الله صلى الله عليه و سلم: " رغم أنف رجل ذُكِرْت عنده فلم يُصَلِّ علي،
و رغم أنف رجل دخل عليه رمضان ثم انسلخ قبل أن يُغفر له، و رغم أنف رجل أدرك عنده أبواه الكب
أو أحدهما فلم يدخلاه الجنة. " (صححه الألباني)



تعرف شنوه معناها الكلام هذا؟
رغم أنف يعني خشمك يتحط في التراب؟ علاش؟ لو كان دخل عليك رمضان و ربي ماغفرلكش ..!
ماهو موسم الرحمة و العتق و مغفرة .. تعرف في الحديث اللولاني شكون ألي يدعي؟ هذا سيدنا جبريل
هو ألي يدعي و سيدنا النبي هو ألي يأمن على دعاءه.. و الدعاء باش؟ بالبعد و دخول النار،
بالخسارة للي يجيه رمضان و مايتغفرلوش.. تعرف علاش؟؟؟
خاطر رمضان أعظم فرصة في حياتك..لو كان تضيعها تستاهل تكون من الخاسرين..
ياندرى تفكيرك تغير على رمضان ولا مازال؟؟؟
ياندرى شتكون من الفايزين ولا من الخاسرين؟؟؟



زيد خوذ عمدك هذه زاده.. تعرف ألي يدرك شهر رمضان، ممكن يدرك منزله أعلى من منزلة الشهيد في الجنة؟؟
أي نعم .. الكلام هذا بالمجد.. إيجا نشوفوا حديث واحد في منزلة الشهيد..
قال رسول الله صلى الله عليه و سلم: " للشهيد عند الله سبع خصال: يغفر له في أول دفعة من دمه،
و يرى مقعده من الجنة، و يُحَلَى حُلة من الإيمان، و يزوج اثنين و سبعين زوجة من الحور العين،
و يُجَار من عذاب القبر، و يأمن من الفزع الأكبر، و يُوضع على رأسه تاج الوقار،
الياقوتة منه خير من الدنيا و ما فيها، و يشفع في سبعين إنسانا من أهل بيته. " (صححه الألباني)
يا الله شنوه هذا الكل هذه منزلة مايستحقهاش كان ألي حارب و قاتل في سبيل الله و استشهد منزلة عظيمة..



تخيل انك باجتهادك في شهر رمضان ممكن توصل لمنزلة أعلى من منزلة الشهيد؟؟
عن طلحة بن عبيد الله: " أن رجلين قدما على رسول الله صلى الله عليه و سلم وكان إسلامهما جميعا،
فكان أحدهما أشد اجتهادا من الآخر، فغزا المجتهد منهما فاستشهد، ثم مكث اللآخر بعده سنة ثم توفي،
قال طلحة: فرأيت في المنام بينما أنا عند باب الجنة، إذا أنا بهما، فخرج خارج من الجنة،
فأذِن للذي توفي اللآخر منهما، ثم خرج فأذن للذي استشهد، ثم رجع إلي، فقال ارجع فإنك لم يأن لك بعد،
فأصبح طلحة يحدث به الناس فعجبوا لذلك، فبلغ ذلك رسول الله صلى الله عليه و سلم و حدثوه الحديث،
فقال صلى الله عليه و سلم: من أي ذلك تعجبون؟؟
فقالوا يا رسول الله: هذا كان أشد الرجلين اجتهادًا ثم استشهد و دخل اللآخر الجنة قبله!!
فقال رسول الله صلى الله عليه و سلم: أليس قد مكث هذا بعده سنة؟؟ قالوا بلى، قال رسول الله صلى الله
عليه و سلم: فما بينهما أبعد مما بين السماء و الأرض. " (صححه الألباني)
سبحان الله الفرق بينهم في الجنة أبعد من السماء و الأرض.. مع أنه الثاني لا حارب ولا استشهد،
أما النبي قال انه أدرك رمضان واجتهد فيه.



يااااااااااااه.. هو شهر واحد.. أي نعم شهر واحد نصبر فيه..
و ربنا بفضله و كرمه يفتح علينا و يعطينا عطاءات و ثواب مانتخيلوش..
لو كان نقلك شهر واحد تخدم فيه و تاخوا أكبر شهرية في حياتك، تصبر في ها الشهر ولا لاء؟
لو كان نسألك شهر واحد تقرا فيه الباهي و تاخوا أكبر شهادة علمية تجتهد ولا لاء؟
أواذني نقلكم شهر واحد نصبروا فيه و ناخذوا كل الثواب و الرحمة و المغفرة..



وقت ألي تعرف أنه الصحابة و السلف الصالح كانوا يدعيوا ربي قبل بـ6 شهور انه يبلغهم رمضان..
و بعد مارمضان يتعدى.. يقدوا يدعيوا ربي بقية العام انه يتقبل منهم أعمالهم في رمضان
تعرف ألي هو كان محور حياتهم العام الكل..
الناس هاذي عرفت شنوه معناه رمضان، فكان لازم يكون هذا حالهم قبل و بعد رمضان..
مالا شكون فينا شيكون كيفهم؟؟؟



شكون فينا شيقدر رمضان و يعطيه حقه.. شكون فينا الشيطان موش مشيضحك عليه
و شخليه يقعد يسوف حتى لين الشهر يوفى و هو غافل؟؟
نحبك تفكر بالباهي:
لو كان ربي كتبلك عمر حتى رمضان معناها انت عندك فرصة ماتتخيلهاش مالا ماتضيعهاش..
تقلي كيفاش؟؟؟
نقلك.. قداش من أصحابك و أقاربك مات قبل رمضان؟؟
يعني وقت ماتخلط على رمضان لازم تحس بها النعمة .. و تشكر ربي.. و تستغلها أحسن استغلال..
و تكون من الفايزين برحمة ربي و العتق من النار في ها الشهر الفضيل..
لازم تجتهد و تعمل أقصى جهدك..



تعرف علاش؟؟
خاطر ماتعرفش شتعيش لرمضان الجاي ولا لاء.. مافما حد يضمن عمره..
ممكن يكون هذا آخر رمضان في حياتك..!!
خلي الكلام هذا في بالك ديما.. باش ماتتيوفش و يكون حافز و منشط ليك على الطاعة في رمضان..
و خلي شعارك في العام هذا:
لئِن أدركت رمضان.. ليَرَيَنّ الله ما أصنع..



مالا فيق و يزي من النوم ماعادش بكري عليك
[ندعوك للتسجيل في المنتدى أو التعريف بنفسك لمعاينة هذه الصورة]





الجزء الثالث: كيفاش نستعد؟؟؟

كل عام يبدا رمضان.. و تقول أتو نختم القرآن 10 مرات، وفي الآخر تختم ختمة وحده وممكن ماتكملهاش!!
و تقول أتو نصلي التراويح كاملة بجزء و جزءين واحتمال نكمل الصلاة وحدي في الدار و زاده تبخل
و ممكن تصلي كان ركعتين في التراويح!!
تقول مانيش مش نتفرج على الأفلام و المسلسلات و تضعف واتبع أكثرهم!!
تقول أنا شنكون أحسن واحد و نصلي كل الفروض في الجامع في أول صف و بعد ماتمشيش!!
تقول رمضان هذا شيكون بداية التزامي، ومع كل أسف أول مارمضان يوفى تنسى كل شيء!!
و تندم بعد رمضان وقت ألي تلقى فلان و فلان ختموا قداش من ختمة و صدقوا و عملوا كل خير،
و حتى لو كنت معاهم تلقاهم سبقوك
مع أنه مافم حتى فرق بينك و بينهم .. !!
قداش من مرة عدى عليك رمضان و قلت "لن أدركت رمضان المقبل ليرينّ الله ماأفعل"
و يعدي رمضان و ماتعمل شيء..



علاش هذا الكل؟؟؟
على خاطر أحنا ماستعديناش بالطريقة الصحيحة.. خاطر احنا ماناش متعودين على العبادات الكبيرة..
ماينفعش نجيو فرد مرة في رمضان ونقولوا احنا شنعملوا كل شيء،
ووقت الي نلقاو رواحنا ماعملنا شيء يجينا احباط
و نقول احنا هكا مافماش فايدة و مانا نافعين لشيء..
لو كان نسألك قداش عمرك ؟؟؟ و عدى عليك قداش من رمضان و ضيعته؟؟؟
فكرتشي تسأل روحك ها السؤال؟؟؟



مالا تخيل معايا انك في ها اللحظة تولدت من جديد..
شنية العيوب الي تحب تصبحها في روحك؟
شنوه أكبر ذنب عملته مقلقك و تحب تتخلص منه؟
شنية أكثر حاجة حلوة كنت تحب تعملها من بكري و لتو ماعملتهاش؟
شنوة رأيك من رمضان السنه نبداو صفحة جديدة؟
ماذا بينا نتغيروا و نعملوا برشة حاجات.. موش هكا؟؟؟
مالا خلينا نعملوا شعار عام السنة:
رمضان العام السنة شيغيرلي حياتي..



ماذا بينا نتغيروا بالمجد .. ونبداو صفحة جديدة مع ربي.. كل واحد فينا يفكر شنوه يحب يعمل..
و شنوه الي يلزم يغيره في حياته..
و يحط في فكره انه شيخرج انسان جديد بعد رمضان السنه.. ماللخر رمضان السنه شيكون مختلف..
و مافماش حد شيكون أحسن مني..
و مافماش حد شيسبقني.. رمضان السنه شيكون بداية التزامي بإذن الله..
رمضان السنة مش مشيتعدى الا ماتتغفرلي ذنوبي الكل..
البلاد اتغيرت و انا زاده لازم نتغير.. رمضان السنه شيكون مخالف لأي رمضان اتعدى قبل..
أيواش لا شهوة تقيدني ولا ذنب يبعدني عليك يارب.. و رمضان السنة شيكون بداية التغيير الحقيقي في حياتي..



وباش هذا الكل يتحقق لازم نستعد من توه.. أي من توه.. حالا.. أي وقت وصلك فيه كلامي ابدا استعد..
وحتى لو كان وصلك و انت في رمضان ماتيأسش.. واستعن بالله و جدد نيتك واجتهد في الطاعة..
مالا احنا علاش نقول في ها الكلام من توه؟!
على خاطر لازم تكون النية في قلوبنا من تو..
وربي يرى في قلوبنا الصدق و العزيمة..
ممكن واحد فينا يموت اليوم ولا غدوه.. شكون يعرف..
لو ماعندوش النية انه يتغير و يتوب ممكن يموت على حالته السيئة الي عايش فيها مع كل أسف..
أما لو كان عنده النية من تو و مات قبل رمضان ربي يكتبله الأجر..
و الإستعداد الحقيقي يكون من شهر رجب ولا حتى من قبل..
قال أحد السلف الصالح و يسمى أبوبكر الوراق: " شهر رجب شهر للزرع، و شعبان شهر السقي للزرع،
و رمضان شهر حصاد الزرع. "
و أول بذرة من بذور شهر رجب ألي مشتكون عدتنا الإيمانية لشهر رمضان،
هي التقرب إلى الله تعالى بوظيفة العمر.. ألا وهي التوبة..



1ــ التوبة:
موش انت على طول ضايع و حياتك داخلة بعضها ؟
موش انتي تعمل أي حاجة باش توصل للسعادة و ديما مخنوق وماكش سعيد؟
هذا الكل بسبب الذنوووووووووووووووب..
ماقلقتش من الذنوب.. موش ناوي اتوب..
ابجاو نجددوا التوبة من تو قبل رمضان..
و كل واحد يقول لروحه يززززززي من الذنوب..
لازم البداية تكون توبة من تو..
ــ توبة من كل حاجة عملناها ماترضيش ربي..
ــ توبة من كل معصية ارتكبناها سر ولا جهر..
ــ توبة من الغفلة و التقصير و طول الأمل..
ــ توبة شاملة و إن شاء الله تكون نصوح..
ــ توبة نبدا بيها صفحة جديدة مع ربي..
وكلنا يقين انه ربي شيقبلها منا، و تفرح بتوبتنا، ونكونوا على يقين بهذا لأنه أخبرنا بيه نبينا..
قال صلى الله عليه و سلم: " لله أفرح بتوبة عبده " (متفق عليه).



مالا خلينا نرجع و نتوب لربي ألي يناديلنا:
" قُلْيَا عِبَادِيَ الَّذِينَ أَسْرَفُوا عَلَى أَنْفُسِهِمْ لا تَقْنَطُوامِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُهُوَ الْغَفُورُ الرَّحِيمُ " (الزمر/53).
مهما كانت ذنوبك و معاصيك رد بالك تيأس.. باب التوبة مفتوح.. و ربي يقبل حتى لو كان ذنوب قد الدنيا الكل.. انت بركه ارجع و توب..
ارجع بقلبك.. و قول راجعلك يارب.. توب و قلع ذنوبك و اندم عليهم..
قال تعالى: " وَمَنْ يَعْمَلْ سُوءًا أَوْ يَظْلِمْ نَفْسه ثُمَّ يَسْتَغْفِر اللَّه يَجِدْ اللَّه غَفُورًا رَحِيمًا " (النساء/110)
و قال تعالى في الحديث القدسي: " يا ابن آدم انك مادعوتني و رجوتني غفرت لك على ماكان منك ولا أبالي " (حسنه الألباني)
ايجا نقوموا تو نتوضاو و نصليو ركعتين لله بنية التوبة النصوح من كل المعاصي،
و في السجود نبكي و نتذلل لله باش يعاونا على التوبة،
و يثبتنا مهما واجهنا من فتن و من إبتلاءات..



2ــ الدعاء
سلاح رهيب في ايدينا الكل، و للأسف غافلين عليه، لو كان عرفنا قيمة الدعاء راهي حياتنا الكل اتغيرت وراهي حال الأمة الكل
اتغيرت للأفضل بمشيئة الله تعالى ..
انت هكا ولا هكا ضعيف و ذليل لله تعالى و ديما محتاج لبرشه حاجات و مهما أخذت بالأسباب تقعد ديما تطلب العون من رب الأسباب بالدعاء..
تعرف ألي مايدعيش ربي شنوة بصيرله؟ ربي يغضب عليه!!!
قال صلى الله عليه و سلم: "من لم يسأل الله يغضب عليه" (صححه الألباني)
و من أهم الأدعية الي ندعي بيها في ها الفترة:
ــ يا حي يا قيوم يرحمتك أستغيث أصلح لي شأني كله ولا تكلني إلى نفسي طرفة عين..
ــ اللهم يا مقلب القلوب ثبت قلوبي على دينك..
ــ اللهم بلغنا رمضان، اللهم سلمنا إلى رمضان، وسلم لنا رمضان، و تسلمه منا متقبلا..



و لو كان نسأله أنفسنا بعد هذا الكل شنية أكثر حاجة نحبه نجتهدوا فيها في رمضان؟؟
الإجابة شتكون صيام و قرآن و قيام ..
هاذم أكثر حاجة في العبادات، و داخل في القيام الدعاء، وزيد الصدقات و أعمال البر،
يعني هاذم أكثر حاجة نركز عليها..
يعني نبداو بتثبيت ورد قرآن و نزيده عليه بالشوية بالشوية..
ووقت القيام نبداو نتعودوا على الوقوف بين يدين الله و الناس راقده،
و نتفلموا الدعاء و المناجاة و نتذوق طعم القرب من الله في قيام الليل..
والصيام نزيد فيه قد مانقدروا يعني ندخل رمضان و احنا متعودين على الصيام في الطقس السخون..





و فم زوز ملاحظات لازم نركز فيهم:
أول ملاحظة: العبادة مع الإنسان تمر بـ 3 مراحل: المجاهدة ثم الإعتياد ثمالتلذذ ..
لو كان نتكلم على قيام الليل كمثال:
في اللول نجاهد باش نقوم نصلي و من المستحسن في الثبث الأخير من الليل..
هذه أول حاجة و هي مرحلة شاقة نجاهد فيها نفسي و نتعب باش نقوم بالطاعة..
و بعد مدة تجي مرحلة الإعتياد يعني تستانس.. أنا تعودت لازم كل يوم نقوم نصلي ركعتين قيام..
ماينعش نهار يعدي من غير مانقوم بيهم..
بعد تجي مرحلة التلذذ بالطاعة.. أنا مستمتع بالعبادة و فرحان ألي أنا نقوم بيها..
و هذه حاجة أخرى يعني تقوم الليل و انت بحب و قلب مشتاق للقيام..
تعبد ربي بحب و بقلب وقلب متعلق بيه و هذه ألي نقول عليها: "من ذاق عرف، و من عرف اغترق"..
يعني من بعد ماتنجمش تفوت ليله وحده من غير قيام..
كان أحد السلف من التابعين يقول: "جاهدت نفسي في قيام الليل سنة، و تلذذت به عشرين سنة"
الناس هذه قداش عرفت ربي و عرفت شنوه معناها قرب من الله عام كامل يجاهد في روحه باش يوصل..
موش احنا الي مستخصرين أشهر قبل رمضان.. هذه كانت أول ملاحظة.. و شنوة الهدف منها؟؟
نحبوا ندخلوا رمضان واحنا نتلذذ بالطاعة، نحبوا نتذوقوا القرآن و نتذوقوا الصلاة و نتذوقوا الصيام..
لازم نصبروا.. الموضوع مش بين نهار و ليلة .. نجاهد و نتعود و ربي شكور وهو يرزقنا باللذة
و احنا على يقين بفضله و كرمه عز و جل..





ثاني ملاحظة: لازم نتعلم سياسة النفس!!
شنوة معناها؟؟؟
يعني الموضوع مايجيش مرة وحده..
موش من النهار اللول نعمل 11 ركعة!!
موش من النهار اللول نعمل ورد 10 أجزاء..
موش نبدا بالصيام كل يوم..
لا.. سياسة النفس يعني فن التعامل معاها.. بالشوية بالشوية.. نبدا بركعتين قيام..
أتو تقلي ركعتين أكهو؟؟ نقلك آه أكهو..
لحد وقتاش نعمل ركعتين برك؟؟ لحد ماتاعود عليهم و مانستغناش عليهم و نبطلهمش
لو كان شنوة الي يجرى ومانجمش نعيش بلا بيهم
ولو كان فوتهم نقضيهم و نعاقب نفسي عليهم.. نقولوا مثلا جمعة ولا 10 أيام ..
و بعدها تلقى روحك لازم تصلي ركعتين كل يوم،
و من بعد تبدا تزيد تخليهم 4 و تكمل هكا جمعتين و لا ثلاثة و بعدها تزيد و تواصل هكا.. فاهم كلامي؟؟
و بعدها يدخل رمضان وأنا متهيأ أني نزيد و تكون الـ11 ركعة متاع التراويح أسهل مايكون بإذن الله..
كيف كيف في القرآن.. نعمل نفس النظام حتى نوصل للي نحب عليه..
و هذا الكل بفضل ربي.. ولا حول و لاقوة لنا إلا بالله..
كله بفضل ربي الكريم سبحانه و تعالى..





مانا نستعين بالله و نبداو.. و يزي من البخل و الأعذار الوهمية.. و الي يحب يتغير و صادق مع ربي
أكيد ربي يعاونه.. و الي شيلوج على مبررات أتو يلقى 100 مبرر!! و الناس الي عندها امتحانات،
ماتخافش هذا مايأثرش عليهم.. بالعكس يخليهم في نشاط و يعاونهم في المراجعة بإذن الله تعالى..
يعني اتفقنا.. ألي بإذن الله نبداو نعملوا و نجتهد في الطاعات في الفترة الجاية..
موش علجال نستعد لرمضان برك.. لا أحنا في نفس الوقت
لازم نكونوا عارفين أهمية الإجتهاد في شهر رجب و شعبان..
شهر رجب من الأشهر الحُرُم، و عنده مكانه عظيمة بين الأشهر..
و شهر شعبان النبي صلى الله عليه و سلم كان يجتهد فيه في العبادة و خاصة عبادة الصيام..
قالت السيدة عائشة رضي الله عنها: " مارأيت رسول الله صلى الله عليه و سلم
استكمل صيام شهر إلا رمضان، وما رأيته أكثر صياما منه من شعبان ". (متفق عليه)
و لما سأل النبي صلى الله عليه و سلم عن هذا قال: عن أسامة بن زيد قال: "قلت يارسول الله لم أرك تصوم
من شهر من الشهور ماتصوم من شعبان؟؟؟ قال صلى الله عليه و سلم : ذاك شهر يغفل عنه
بين رجب و رمضان و هو شهر ترفع فيه الأعمال إلى رب العالمين
و أحب أن يرفع عملي و أنا صائم " (حسنه الألباني)




شهر شعبان من أهم الشهور في العام.. تترفع فيه أعمال العام الكل لله عز و جل..
فرصة نتوب باش يترفعلك تقرير مشرف منور بالتوبة و الأعمال الصالحة..
النبي صلى الله عليه و سلم يقول: " إنما الأعمال بالخواتيم " (متفق عليه)
لوكان نقلك أنه فما تقرير شيترفع لمديرك في الخدمة ولا لرئيس الجمهورية.. شنوة يكون موقفك؟؟؟
قداش مش تجتهد باش تحسن التقرير.. مانا لازم تخلط تطهر تقريرك قبل مايترفع لله عز و جل..
لازم تخلط تطهر صحيفتك من الذنوب و المعاصي ربي وحده إلي يعلم بيها..
و تخيل لو تبت و تقرير مشرف ترفعلك للمولى عز و جل.. تخيل ربي قداش شيفتح عليك و يرزقك و يباركلك.. فرصة عظيمة..
و زاده شهر شعبان فيه ليلة النص من شعبان.. تعرف فضلها قداش؟؟؟
قال صلى الله عليه و سلم: " إن الله ليطّلِع في ليلة النصف من شعبان،
فيغفر لجميع خلقه إلا لمشرك أو مشاحن" (صححه الألباني)




مش انت تحب ربي يغفرلك.. أكيد.. مالا فاش تستنى طهر قلبك من الحقد..
ربي يغفر لكل الخلق إلا المشرك و المشاحن.. المشاحن يعني ألي متعارك مع حد..
نصيحة الي متعارك مع حد يسامحه لوجه الله.. امشيلوا و اعتذرله.. و سامحه باش ربي يسامحك..
و ماتضيعش المغفرة من يدك على حاجة كيما هذه.. سامح الناس و خلي قلبك أبيض..
الفترة هذه بإذن الله نبداو بالشوية.. ونتدرج في الطاعات..
ندخل رمضان و احنا في مستوى إيماني يأهلنا برحمة ربي اننا نكون من المعتوقين من النار..
ربنا شكور.. والله شكور.. مش معقول يلقاك تستعد و صادق و يحرمك..
تعودنا على كرم ربي و رحمته و حسن ظننا بيه إنه يبلغنا و مايحرمناش بفضل كرمه سبحانه..
و إن قدر سبحانه يوفى أجل أي واحد منا قبل رمضان، نكونوا متنا على طاعة و نية صالحة..
يلزمنا نعودوا رواحنا من تو..





أما يلزمك ترد بالك على حاجة مهمة برشه..
رد بالك تخلي الإحباط ولا اليأس يتسلل لقلبك لو كان مانجمتش تعمل أي طاعة..
انت ممكن تحاول من الليله انك تقوم وتصلي ركعاين حتى ركعتين للتوبة كيما ذكرنا في أول نقطة،
و بعد تختم بالوتر.. كان تعمل هذا يكون جزاك الله كل خير.. أما لوكان ماعملتش؟؟؟
لو كان ماعملتش رد بالك تقول أنا مانيش وجه نعمة ولا ربي مايحبليش الخير
ولا مافماش فايدة مني و الكلام هذا...!!
رد بالك هذا الكل كلام الشيطان..





كيما قلنا.. في اللول يكون صعيب عليك ركعتين، أما مع الوقت تلقى النوافل الكل ولات أسهل مافمى
بإذن الله.. رد بالك تيأس..
إذا مانجمتش.. ادعي ربي.. وحاول مرة ثانية و ثالثة و عاشرة..
و حط في بالك انه عادي انك تلقى صعوبة في اللول، أما مع الوقت كل حاجة تسهال..
برك شوية صبر في اللول..
ولازم تحط في بالك زاده حاجة مهمة:
(أحب الأعمال إلى الله أدومها، و إن قلّ)
ربنا يثبت قلوبنا على الإيمان و التقوى.. اللهم آمين..


مالا فيق و يزي من النوم ماعادش بكري عليك


[ندعوك للتسجيل في المنتدى أو التعريف بنفسك لمعاينة هذه الصورة]






الجزء الرابع: شتصوم ولا كيف كل عام؟؟؟


لو كان نسألك.. انت شتصوم.. ولا كيف كل عام؟
أتو تضحك.. وتقلي قديمة جيب الجديد شنصوم كيف كل عام..
نقلك لا يا خويا.. لا يا أختي.. احنا مش حابين نصوموا كيف كل عام..
أتو تقلي شنوه معناه الكلام هذا؟
نقلك.. شوف فم برشه ناس عارفه معنى الصيام!! ممكن ناس عايشة 30 و 40 و 50 سنة
و هي تصوم أما مع كل أسف ماتعرفش تصوم..
تصوم صيام ناقص.. إلا من رحم ربي..
أتو تقلي هو فم صيام ناقص و صيام كامل؟





نقلك انتي كيفاش تصوم؟؟
أتو تقلي نصوم على الماكلة و الشراب و الجماع حتى لين يذن المغرب..
نفلك أكهو؟؟؟
أتو تقلي مالا شنوه ولا فما فتوة جديده غير هذا..
نقلك.. لا مافماش فتوه أما انت هكا صيامك ناقص.. شنوه معناها ناقص؟؟؟
نقلك ياخويا و نقلك يا أختي و ركزوا في الكلام: انت ممكن تكون تصوم على الماكلة و الشراب و الجماع
أما ثواب الصيام متاعك يكون ناقص و ممكن ماتاخوش ثواب بعد هذا الكل.. تعرف علاش؟
لأنك للأسف ماكش فاهم معنى الصيام الحقيقي..





الصيام = صيام بجميع الأعضاء و الجوارح
يعني تصوم بمعدتك و تصوم بفرجك و تصوم بوذنك و تصوم بعينك و تصوم بلسانك و تصوم بقلبك..
لازم تصوم بجميع جوارحك..
نحبك تفهم معنى الصيام الحقيقي باش تحقق الهدف و الغاية منه ألي هي التقوى..
قال الله تعالى: " يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ "
( البقرة/ 183)
الصيام مش مجرد الإمتناع على الماكلة و الشراب من الفجر للمغرب.. الصيام أعظم من هكا ببرشه..
قال رسول الله صلى الله عليه و سلم: " ليس الصيام من الأكل و الشرب، إنما الصيام من اللغو و الرفث "
(صححه الألباني)
وقال رسول الله صلى الله عليه و سلم: " رُبّ صائم ليس له من صيامه إلا الجوع، و رُبّ قائم ليس له
من قيامه إلا السهر" (صححه الألباني)
و قال صلى الله عليه و سلم أيضا: " من لم يَدَع قول الزور و العمل به فليس لله حاجة في أن يدع طعامه
و شرابه " (رواه البخاري)
ليس لله حاجة في أن يدع طعامه و شرابه، معناها الصيام متاعه مافم منه حتى فايده..
مادام هو مصر على قول الزور والكذب و غيره!!
قال الصحابي الجليل جابر بن عبد الله رضي الله عنه: " إذا صمت، فليصم سمعك، وبصرك،
ولسانك عن الكذب و المأثم، و دَعْ أذى الجار، وليكن عليك وقارو سكينة يوم صومك،
ولا تجعل يوم فطرك و يوم صومك سواء ".





مالا شفت انه الموضوع مش موضوع صيام على الماكلة و الشراب و الجماع برك..
عرفت ألي الموضوع هو عبادة يحبها ربي.. و أنا لازم نصوم كيما ربي يحب..
لازم نصوم بكل جوارحي و أعضائي..
شتصوم بمعدتك، كيما انت قلت في اللول انك تصوم بمعدتك من الفجر للمغرب على الماكلة و الشراب..
و شتصوم بعينك.. كيفاش؟؟؟ تغض بصرك.. وهنا شتقول مانجمش!! البنات في كل بلاصة و التلفزة
و الأنترنت و الشارع..
نقلك لا تنجم.. انت نجمت تشد روحك على الماكلة و الشراب ألي هوما حلال..
وماتنجمش تشد روحك على الحاجات الحرام؟





بقدرة ربي تنجم.. عيش حياتك طبيعية و أول ماعنيك تجي على وحده تغض بصرك..
تقلي و المرة الأولى ألي عيني جات عليها هذيكا تتحسبلي؟ نقلك ماتتحسبلكش على خاطرك ماتعمدتهاش..

النظرة الأولى ألي هي نظرة الفجأة.. وهذا مش معناه انك تقعد تنظر ربع ساعة و تقول هذه النظرة الأولى!!

على شكون مش تضحك؟؟ الموضوع بسيط بإذن الله انت برك جاهد نفسك..
قول لروحك أنا صايم صايم صايم..
تجي بنية تتعدى قدامك تفكر عينك ألي انت صايم و تغض بصرك و تقول مانيش مش ننظربها..
و انت زاده أختي لازم تغضي بصرك .. أتو تقلي الي نعرفه انه غض البصر للرجال برك..
نقولك لا كيما الراجل ربي أمره باش يغض بصره على النساء،
المرا زاده ربي أمرها باش تغض بصرها على الرجال.. و اللآيتين وراء بعضهم في سورة النور.
قال تعالى: " قُلْ لِلْمُؤْمِنِينَ يَغُضُّوا مِنْ أَبْصارِهِمْ وَيَحْفَظُوا فُرُوجَهُمْ ذلِكَ أَزْكى لَهُمْ إِنَّ اللَّهَخَبِيرٌ بِما يَصْنَعُونَ(30)
وَقُلْ لِلْمُؤْمِناتِ يَغْضُضْنَ مِنْأَبْصارِهِنَّ وَيَحْفَظْنَ فُرُوجَهُنَّ وَلا يُبْدِينَ زِينَتَهُنَّ إِلاَّ ما ظَهَرَ مِنْها "
(النور/ 30-31)




و نحب انبه على موضوع ضروري.. موضوع تصاور النساء على الأنترنت في المنتديات و في الفايس بوك
بالله بلاش منها ها التصاور
يزيو من السيئات.. لو انت حطيت ولا انتي حطيتي تصويرة أي بنت في توقيعك ولا في صورتك الرمزية..
كل واحد يشوفها انتي تاخوا سيئات كيفك كيفوا.. علاش هكة.. علاش تهز وزرك و وزر غيرك؟؟؟
و العكس لو حطيت آية أو دعاء أو ذكر تاخوا حسنات كل واحد يقراها.. تاخوا ثوابك و ثواب غيرك..
مالا علاش تضيع ها الثواب؟؟
من تو نحي كل ها التصاور و غيّرها..





مالا اتفقنا.. انك تصوم بمعدتك و تصوم بعينك.. و زاده تصوم بوذنك.. كيفاش؟؟
يعني ماتسمعش منكرات.. موش ليل و نهار الأغاني في وذنك.. صاحبك يجي يقلك البنية الفولانية..
تقله لا أنا صايم مانحب نسمع سيرة حد.. أيواش هكه نحبك تكون.. و زاده تصوم بلسانك.. كيفاش؟؟
برشه ناس تعمل الصيام حجة للغُش و السبان و الكذب.. و هذا كيما قلنا عكس الهدف من الصيام..

المفروض انك تصوم يعني تصوم بلسانك زاده.. موش تكذب و تشهد زور.. يعني تبطل تغتاب..
تبطل تجيب سيرة الناس.. و تشد روحك و ماتسب حد ولا تسيء لحد..
تقلي ماننجمش كل شيء ولا لساني.. مانعرفش نسكت.. ومانججمش نتحكم فيه!!
نقلك لا تنجم.. انت نجمت تشد روحك على الماكلة و الشراب ألي هي حلال..
وماتنجمش تشد روحك على الحرام؟





بقدرة ربي تنجم.. انت بركه استعين بالله.. و زيد من الذكر و ماتلهيش روحك بالقعدة
و الكلام مع الناس من غير سبب.. و شد لسانك..
و لو كان واحد سبك ولا هانك سامحه.. و قول اللهم إني صائم..
سامح ياخويا.. سامح يا أختي..
ميسالش استحمل.. و ربي مايضعلكش حقك.. انت هكا خذيت أجر كبير و حقك عند ربي..
قال رسول الله صلى الله عليه و سلم: " من كظم غيضا و هو قادر على أن ينفذه،
دعاه الله عز و جل على رؤوس الخلائق يوم القيامة، حتى يخره الله من الحور ماشاء " (حسنه الألباني)
مالا؟؟ قلي شنوة تعمل؟؟ شتقلي مرة أخرى ماننجمش؟؟ أعصابي تفلت مني موش بيدي؟؟
استعن بالله و بقدرة ربي أتو تنجم..
قال رسول الله صلى الله عليه و سلم: " و الصيام جُنّة، إذا كان يوم صوم أحدكم فلا يرفث ولا يصخب،
فإن سابه أحد أو قاتله فليقل إني امرؤ صائم " (متفق عليه)
مالا اتفقنا كيفاش مش نصوموا؟؟
نصوموا بكل أعضاءنا و جوارحنا.. نصوموا و نمتنع على كل حاجة تغضب المولى سبحانه و تعالى..
نصوموا و نحافظ على الصلاة في وقتها.. خاطر مايجيش منه واحد صايم و مايصليش!!
إن شاء الله العام هذا ماناش مش نصوموا كيف كل عام..

مالا فيق و يزي من النوم ماعادش بكري عليك

[ندعوك للتسجيل في المنتدى أو التعريف بنفسك لمعاينة هذه الصورة]




الجزء الخامس: رد بالك تكون مسلسل؟؟؟


التلفزة في رمضان = مسلسلات..
سبحان الله المسلسلات موجوده العام الكل.. أما في رمضان، أهل الباطل لازم يبذلوا مجهودهم الكل
باش يسلسلوا الناس قدام التلفزة بكمية المسلسلات ألي ماتخلطش تشوفها الكل من كثرتها..

لى هذاكا نقلك رد بالك تكون مسلسل و مربوط قدام التلفزة في رمضان..





أتو تقلي ماهو أنا لازم بالنهار نفرهد صيامي و بالليل نفرهد سهرتي..
نقلك ياخي مافما كان المسلسلات تفرهد بيها صيامك؟؟؟ خلي عندك عقل! أنا مانيش شنقلك حلال ولا حرام..

أما بالشوية نحبك تجاوبني على الأسئلة هذه.. أما تجاوبني بعقلك..و إيجا نتفقوا على حاجات و بعد نتكلموا..





لو كان عندك امتحان باكالوريا و مازال على الإمتحان شهر.. وقتها شتتفرج على المسلسلات؟؟؟
لو كان دخلت مسابقة من سيربح المليون، و قدامك شهر واحد، وانتي بالطبيعة تحضر طامع في المليون،
ممكن تسيب التحضير و تتفرج على المسلسلات؟؟؟
لو كان تقدملك عرض من شركة معينة انك تفضي روحك لمدة شهر بعد خدمتك مقابل مبلغ 10 ملاين
ولا حتى 5 ولا 3 ، ساعتها ممكن تضيع العرض و تتفرج على المسلسلات؟؟؟
لو كان شتناقش رسالة دكتراه أو .... أو ...
الخلاصة.. وقتها بالطبيعة تقول نكمل المهمة ألي في يدي و نعدي الشهر اللول
و المسلسلات يعاودوها العام الكل! موش هكا؟؟





مالا أحنا تو اتفقنا على أول نقطة.. لو كان فما حاجة مهمة، و هدف تحب تحققه في شهر
ماكش مش تهتم بالمسلسلات، تخليها و تشوفها في الإعادة بعد الشهر..
انت مش لاقي هدف في رمضان؟ يعني العتق من النار مايساويش المليون
أو المسابقة أو أي هدف دنيوي؟؟؟
و هنا ممكن واحد يقلي: لكن أنا نتابع في مسلسلات باهية و عندها أهداف
يعني شنوه فيها لو كان تبعتها شوية طاعات و شوية مسلسلات؟؟
باهي أنا مانيش شنجاوب.. نخليك انت تجاوب روحك..
المسلسلات الهادفة المحترمة ألي انت تحكي عليها،
موش فيها نساء مش متحجبين و رؤيتهم حرام؟
موش فيها موسيقى و أغاني؟
موش فيها قصص حب حرام و صحبة؟
موش فيها انك تضيع فرصة رمضان بكل ألي فيها
و انت ماكنتش شتعمل هكا مع أي حاجة دنيوية؟





وخوذ السؤال هذا و جاوب بنفسك..
أحنا عارفين أنه أي حاجة نعملها، إما في ميزان حسناتنا وإما في ميزان سيئاتنا؟ المسلسلات وين شتكون؟
أكيد مش ممكن تكون مع القرآن و الصلاة و الصيام و الدعاء و الصدقة.. عرفت وين شتكون؟؟؟
ملا علاش تعمل هكا و شنوة الفايدة؟؟؟
بالله انوي بصدق انك ماكش شتتفرج على أي مسلسل ها العام..
خسارة تضيع وقتك في معصية و الناس تطيع في ربي!
رد بالك تكون بعيد وقت ألي الناس الكل تحاول تقرب..
و لو انت حريص على المعاصي و خايف لا سيئاتك تنقص.. نحب نطمنك.. ماتخافش..
كل المسلسلات يعاودوها بعد رمضان.. مش شيفوتك الوزر!
أما بربي موش في رمضان..





الناس الكل تتمنى تموت على طاعة.. الناس الكل تتمنى تموت في شهر رمضان..
ياندرى انت لو مت في شهر رمضان تحب تموت قدام مسلسل!!
نحبك تخاف على حسناتك.. انت طول النهار صايم و تقرا في القرآن و تذكر الله و تتصدق..
ماتضيعش هذا الكل قدام التلفزة..
تاخوا شوية حسنات و بعد تضيعهم؟؟!!
سبحان الله.. علاش هكا..
انت مستخسر في روحك الحسنات ألي تاخذها ؟؟ !!

مالا فيق و يزي من النوم ماعادش بكري عليك
avatar
kamelo
مشرف أنظمة التشفير التلفزيونية
مشرف أنظمة التشفير التلفزيونية

العمر : 44
تاريخ التسجيل : 07/11/2009

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى